| |
| புதுக்கோட்டை பிரிக்கப்படுமா? Feb 3, 10 |
| |
தமிழகத்தின் பெரிய கோட்டமும் நிர்வாக ரீதியாக பொதுமக்கள் அதிகம் பிரச்னைகளைச் சந்திக்கும் கோட்டமுமான புதுக்கோட்டை வருவாய்க் கோட்டத்தைப் பிரிக்க வேண்டும் என்று அனைத்துத் தரப்பினரும் எதிர்பார்க்கின்றனர்.
முந்நூறு ஆண்டு காலம் தொண்டைமான் மன்னர்களின் முடியாட்சியின் கீழ் இருந்த புதுக்கோட்டை சமஸ்தானம் கடந்த 3.3.1948-ல் ஒன்றுபட்ட இந்தியாவுடன் இணைக்கப்பட்டது. தொடர்ந்து திருச்சி மாவட்டத்தின் ஒரு வருவாய்க் கோட்டமாக இருந்து வந்த நிலையில், கடந்த 1974, ஜனவரியில் அப்போதைய முதல்வர் மு. கருணாநிதியால் தமிழகத்தின் 15-வது மாவட்டமாக புதுக்கோட்டை மாவட்டம் உதயமானது.
தனி மாவட்டமான பிறகு, புதுக்கோட்டை வருவாய்க் கோட்டத்துடன் தஞ்சாவூர் மாவட்டத்தில் இருந்த கந்தர்வகோட்டை, அறந்தாங்கி, கீரமங்கலம் ஆகிய பகுதிகளும் இணைக்கப்பட்டன.
சுமார் 4600 சதுர கிலோ மீட்டர் பரப்பளவில் அமைந்துள்ள இந்த மாவட்டத்தில், முதல்கட்டமாக அறந்தாங்கி, புதுக்கோட்டை ஆகிய 2 வருவாய்க் கோட்டங்கள் உருவாக்கப்பட்டன. 13 ஊராட்சி ஒன்றியங்கள், 11 வட்டங்கள், 498 ஊராட்சிகள், 758 வருவாய்க் கிராமங்கள் என்று இந்த இரு கோட்டங்களும் அமைந்திருக்கின்றன.
இந்த இரு கோட்டங்களில் திருமயம், பொன்னமராவதி, குளத்தூர், கந்தர்வகோட்டை,ஆலங்குடி, கறம்பக்குடி, இலுப்பூர் ஆகிய 8 வட்டங்கள் புதுக்கோட்டை வருவாய்க் கோட்டத்திலும் அறந்தாங்கி, மணமேல்குடி, ஆவுடையார்கோயில் ஆகிய 3 வட்டங்கள் அறந்தாங்கி வருவாய்க் கோட்டத்திலும் இருக்கின்றன.
இதில் புதுக்கோட்டை வருவாய்க் கோட்டத்தில் மாவட்டத்தின் பெரும் பகுதிகள் இணைந்துள்ளதால் மாநிலத்திலேயே மிகப் பெரிய வருவாய்க் கோட்டமாக இது திகழ்கிறது. கேட்பதற்கு "பெரிய' என்ற சொல்லாடல் பெருமைக்குரிய விஷயம்போல காட்சியளித்தாலும், நிர்வாக ரீதியில் இது பெருமைக்குரிய விஷயமல்ல என்பதே உண்மையாகும்.
ஏனெனில், அரசின் செயல்பாடுகள் மாவட்ட நிர்வாகத்தில் ஆணையாகப் புறப்பட்டு, கிராம நிர்வாகத்தில் செயலாக மாற இடையில் முக்கியப் பங்காற்றுவது கோட்ட நிர்வாகம்தான்.
சட்டம், ஒழுங்கு, வருவாய்த் துறை சிவில் வழக்குகள், தாவாக்கள், சமூக நலத் திட்டங்கள், அரசுத் திட்டங்களுக்கான பயனாளிகள் தேர்வு, ஆய்வுப் பணிகள், வகை மாற்றம், ஆக்கிரமிப்பு அகற்றம் ஆகியவற்றில் தொடங்கி திருமணமாகி ஏழாண்டுகளுக்குள் இறக்கும் பெண்களின் சாவு குறித்த விசாரணை, ஜல்லிக்கட்டு வரை சகலப் பணிகளும் கோட்ட நிர்வாகத்திலேயே இருக்கின்றன.
ஆகையால், பெருவாரியான மக்கள் தம் தேவைகளுக்கும் பிரச்னைகளுக்கும் கோட்டாட்சியரையே அணுக வேண்டிய நிலையுள்ளது.
இந்நிலையில், நிர்வாக ரீதியாக நீடித்துவரும் பணிச்சுமை காரணமாக சாதாரண பிரச்னைகளுக்குக்கூட புதுக்கோட்டை கோட்டத்தில் பொதுமக்கள் அலைவதும் காத்திருப்பதும் அன்றாட நிகழ்வாகியிருக்கிறது. அதிகப் பணிச் சுமையால் அலுவலர்கள் ஒரு பக்கம் போராட, பொதுமக்கள் மற்றொரு பக்கம் அலைக்கழிக்கப்படுகின்றனர்.
தமிழகத்தில் கொடைக்கானல் கோட்டம் ஒரேயொரு வட்டத்துடன் செயல்படுகிறது. பல மாவட்டங்களில் இரண்டு அல்லது மூன்று வட்டங்களுடன் பல கோட்டங்கள் செயல்படுகின்றன. ஆனால், புதுக்கோட்டை கோட்டமோ இன்னமும் 8 வட்டங்களுடன் தள்ளாடுகிறது.
இதுகுறித்து புதுக்கோட்டை சட்டப்பேரவை உறுப்பினர் ஆர். நெடுஞ்செழியன் கூறியது:
""அதிகாரப் பரவலாக்கம் என்பதே மக்களாட்சியின் தத்துவம். இதைக் கருத்தில் கொண்டே பல மாநிலங்களும் மாவட்டங்களும் பிரிக்கப்பட்டன; பிரிக்கப்படுகின்றன.
தமிழகத்தில் வெறும் மூன்று வட்டங்களை மட்டுமே கொண்ட பெரம்பலூர் ஒரு மாவட்டமாகச் செயல்படுகிறது. ஆனால், புதுக்கோட்டை கோட்ட பிரச்னை பல ஆண்டுகளாக நீடித்து வருவது வேதனைக்குரியது. புதுக்கோட்டை மக்கள் கோரிக்கைகள் பல இந்த அரசால் தொடர்ந்து புறக்கணிக்கப்பட்டு வருகின்றன. இப்போது அதற்கு மேலும் ஓர் உதாரணமாக இந்தப் பிரச்னை'' என்றார் நெடுஞ்செழியன்.
இதுகுறித்து ஆலங்குடி சட்டப்பேரவை உறுப்பினர் எஸ். ராஜசேகரன் கூறியது:
""பெரிய கோட்டமாக இருப்பதால் பல்வேறு பிரச்னைகளை பொதுமக்கள் அன்றாடம் சந்திக்க வேண்டியிருக்கிறது. இதைத் தவிர்க்க வேண்டியது மிகவும் அவசியம்.
ஆலங்குடியைத் தலைமையிடமாகக் கொண்டு தனி வருவாய்க் கோட்டத்தை உருவாக்கலாம். இதுகுறித்து துணை முதல்வர் மு.க. ஸ்டாலின் மற்றும் வருவாய்த் துறை அமைச்சர் ஐ. பெரியசாமி ஆகியோரிடம் கடந்த 6 மாதங்களுக்கு முன்னரே மனு அளித்தேன். ஆனால், இதுவரை எந்தவித நடவடிக்கையும் இல்லை'' என்றார் ராஜசேகரன்.
நிர்வாகப் பிரச்னை என்பது அனைத்துத் தரப்பு மக்களையும் பாதிக்கக் கூடிய பிரச்னை. ஆனால், அரசு இந்த விஷயத்தில் தேவையற்ற காலதாமதத்தை ஏற்படுத்துவதாக பொதுமக்கள் கருதுகிறார்கள். புதுக்கோட்டை கோட்டத்தை இரண்டாகப் பிரித்து இப்பிரச்னைக்கு உடனடியாகத் தீர்வு காண வேண்டும் என்று அவர்கள் எதிர்பார்க்கின்றனர்.
source : Dinamani |
| |
| |
|
|
|
