| |
| ராங்கியம்மெட்டில் பொதுமக்கள் மறியல் Feb 20, 10 |
| |
புதுக்கோட்டை மாவட்டம், பனையப்பட்டி அருகேயுள்ள ராங்கியம்மெட்டில் மதுக்கடையை (கடை எண்- 6729) மூட வலியுறுத்தி அப்பகுதி மக்கள் வெள்ளிக்கிழமை திடீர் சாலை மறியல் போராட்டத்தில் ஈடுபட்டனர்.
ராங்கியம்மெட்டில் உள்ள இந்தக் கடையை மூட வலியறுத்தி அப்பகுதி மக்கள் மாவட்ட நிர்வாகத்துக்கு பலமுறை மனு அளித்தும் எவ்வித நடவடிக்கையும் எடுக்கப்படவில்லை என்று கூறப்படுகிறது.
இந்நிலையில், அந்தக் கிராமத்தைச் சேர்ந்த பொது மக்கள் வெள்ளிக்கிழமை காலை சுமார் 10 மணியளவில் கடையை முற்றுகையிட்டு சாலை மறியல் போராட்டத்தில் ஈடுபட்டனர்.
இதுகுறித்து தகவல் அறிந்த பனையப்பட்டி காவல் உதவி ஆய்வாளர் மாணிக்கம், டாஸ்மாக் மேலாளர் பாலசந்திரன், திருமயம் வட்டாட்சியர் ஜெயசண்முகம், ராங்கியம் ஊராட்சித் தலைவர் ராமு, மிதிலைப்பட்டி ஊராட்சித் தலைவர் பழனியப்பன் ஆகியோர் பொதுமக்களிடம் பேச்சுவார்த்தை நடத்தினர். ஆனால், தங்கள் கோரிக்கைக்கு உடனடி நடவடிக்கை எடுக்காதவரை போராட்டத்தைக் கைவிட முடியாது என்று பொதுமக்கள் திட்டவட்டமாகக் கூறிவிட்டனர்.
இதைத் தொடர்ந்து, அந்த மதுக்கடையைப் பூட்டிவிட நிர்வாகம் தீர்மானித்து, அனைவரின் முன்னிலையிலும் கடை பூட்டப்பட்டது. இதைத் தொடர்ந்து பொதுமக்கள் போராட்டத்தைக் கைவிட்டு கலைந்து சென்றனர். இதனால், புதுக்கோட்டை-திருமயம் சாலையில் சுமார் 2 மணி நேரம் போக்குவரத்து பாதிக்கப்பட்டது.
source : Dinamani |
| |
| |
|
|
|
