| |
| கவிதைக்கு புதிய வடிவம் தந்தவர் கண்ணதாசன்: ப. சிதம்பரம் புகழாரம் Mar 14, 10 |
| |
காரைக்குடி, மார்ச் 14: படித்தவர்கள் மட்டுமல்ல, படிக்காதவர்கள், கேள்வி ஞானத்தில் புரிந்துகொண்டு வாழ்பவர்களுக்கும் புரியும் வகையில் தமிழ்க் கவிதைக்கு புதிய வடிவம் தந்தவர் கவிஞர் கண்ணதாசன் என்று மத்திய உள்துறை அமைச்சர் ப. சிதம்பரம் புகழாரம் சூட்டினார்.
சிவகங்கை மாவட்டம், காரைக்குடி கவியரசு கண்ணதாசன் மணிமண்டபத்தில் ஞாயிற் றுக்கிழமை நடைபெற்ற 21-ஆம் ஆண்டு கண்ணதாசன் விழாவில் கலந்துகொண்டு கவிஞர்கள் கண்ணதாசன், பாரதியார் உருவப்படங்களைத் திறந்துவைத்து அமைச்சர் ப.சிதம்பரம் பேசியது:
55 வயதில் சரித்திரப் புகழை நாட்டி, நம்மிடமிருந்து மறைந்தவர் கவிஞர் கண்ணதாசன். எல்லோர் நாவிலும் பாடல்களைத் தவழச் செய்த சமகாலத்தில் வாழ்ந்த கவிஞர் அவர்.
இலக்கியம், உரைநடை, கவிதை, நாடகம் என எதுவாக இருந்தாலும், காலத்துக்கு ஏற்ப அது அமைந்தால்தான் நிலைத்த இலக்கியமாக இருக்கும். உதாரணமாக, 60, 70 ஆண்டுகளுக்கு முன்பு இருந்த நாடக அமைப்பை தற்போது அப்படியே அரங்கேற்றினால், அதனைப் பார்க்க யாரும் விரும்ப மாட்டார்கள். காலத்திற்கேற்ப இலக்கியத்தின் முகம் மாற வேண்டும். அப்படி முகம் மாறும்போது இலக்கியத் தரம் இல்லை என்று யாரும் உறுதி செய்ய முடியாது.
கவிதையைப் பொருத்தவரை பாரதியார், பாரதிதாசன் போன்றோர் தங்கள் காலத்துக் கேற்ப எழுத்து முறையை மாற்றிக் கொண்டதால், அவை நிலைத்து நிற்கின்றன. பாரதிதாசன் பாடல்கள் தொடர்ந்து ஒலிக்கின்றன. அவர்கள் காலத்துக்குப் பிறகு வந்த படித்தவர் மட்டுமல்ல, படிக்காதவர்கள்கூட கேள்வி ஞானத்தையே நம்பியுள்ளவர்களுக்குப் புரியும் வகையில் தமிழ்க் கவிதைக்குப் புதிய வடிவம் தந்தவர் கண்ணதாசன். பேச்சுவார்த்தையைக் கூட கவிதை வடிவாக்கினார். பட்டினத்தார் பாடல் புரியாதவர்களுக்குப் புரியும் வகையில், 12 வார்த்தைகளைக் கொண்டு வீடு வரை உறவு, வீதி வரை மனைவி, காடு வரை பிள்ளை, கடைசி வரை யாரோ.. என்ற சொற்கள் சாரத்தால் கவிதை தந்தவர் கண்ணதாசன்.
தமிழ்ப் பாடல்கள், தமிழ்க் கவிதை, சங்ககாலக் கவிதைகள், அதற்கும் முந்தைய கவிதைகள் போன்றவற்றில் உள்ள உயர் கருத்துகளை தமிழ் இலக்கியச் சுவை குறை யாமல் பிழிந்து தந்து சென்றவர் கவிஞர் கண்ணதாசன். கவிஞனுக்குச் சொந்த வாழ்க் கையில் குறைகள், நிறைகள் இருக்கலாம். அது காலப்போக்கில் முடிந்து விடும். நிலைத்து நிற்பது அவருடைய சாதனை, எழுத்துகள்தான். கண்ணதாசன் எழுத வேண்டும், டி.எம். சௌந்தரராஜன் பாட வேண்டும், சிவாஜி கணேசன் வாயசைக்க வேண்டும். அப்படிப்பட்ட பாடல் நூறாண்டுகள் நிலைத்து விடும். அவரது பாடல்கள் நிலைத்திருக்கின்றன. கண்ணதாசன் இப் பகுதியில் பிறந்தவர் என்பது நமக்கு பெருமைக்குரியது. அவரை விஞ்சிய கவிஞன் சம காலத்தில் இன்னும் தோன்றவில்லை. கண்ணதாசனை ஞானக் கண்களாக ஏற்று பல கவிஞர்கள் தோன்ற வேண்டும் எனக் கேட்டுக் கொண்டார் அமைச்சர் ப. சிதம்பரம்.
விழாவில் கவிஞர் அரு. நாகப்பன் வரவேற்றார். முன்னாள் அமைச்சர் மு. தென்னவன் இலக்கிய உரையாற்றினார். சத்தி. திருநாவுக்கரசு தலைமை வகித்துப் பேசினார்.
விழாவில், சட்டபேரவை உறுப்பினர்கள் என். சுந்தரம், கேஆர். ராமசாமி, தொழிலதிபர் பிஎல். படிக்காசு, முத்து. பழனியப்பன், சுப. துரைராஜ், சங்கராபுரம் ஊராட்சித் தலைவர் எஸ். மாங்குடி உள்ளிóடட பலர் கலந்து கொண்டனர். |
| |
| |
|
|
|
